نيتشة والقوة (الحلقة الأولى)

  • 27 - 07 - 2021
  • 662
-"نيتشه" : هو فيلسوف ألماني من فلاسفة القرن التاسع عشر ، عنده مجموعة مؤلفات ، من أشهرها كتاب "هكذا تكلم زرادشت" ..

 

 

 

-شنو فلسفته هذا الرجل ؟

-تدور فلسفة نيتشه حول عدة أمور منها :

 

اولا : القوة ، حيث إعتبر نيتشه أن الفضيلة والخير هي "القوة" فقط ، وإعتبر أن الضعف والتسامح والطيبة "رذائل وشر" ، فالأخلاق اللي يتبناها نيتشه ويدعو الهه ، هي الأخلاق اللي تثبت وتصمد في الحياة ، أي كان نوع هاي الأخلاق ، حسنة أو سيئة ، وأما الأخلاق اللي ماتثبت وماتصمد بالحياة ، فهاي أخلاق تضر أكثر مما تنفع ، حتى لو كانت أخلاق نازلة من السماء ..

-هذا الموضوع ، إله علاقة بنبذ نيتشه للدين المسيحي ؟

-نيتشه نبذ وكره الدين المسيحي بصورة خاصة ، ونبذ كل الأديان بصورة عامة ؛ لأنو هاي الاديان -حسب وجهة نظره- تدعو الى إلى مباديء العطف والإيثار والإستسلام ، وهاي الأمور تخلي الإنسان ضعيف ومابيه حظ ، ودعا إلى وجوب القوة والقسوة والعنف ؛ لأنو هاي الأمور علامة على القوة ؛ والقوي فقط هو وحده اللي من حقه أن يعيش ؛ ولامكان للضعفاء على الارض ..

-وشنو رأيه بالديموقراطية والمساواة ؟

-يگول نيتشه : المساواة والديمقراطية أمور مو زينة ، لأنها تحدد وتقلل من قوة القوي وماتخليه ينطلق على سجيته ، وتضيف للضعيف قوة وهمية مو حقيقية ؛ يعني الديموقراطية والمساواة بين الناس تضعف القوي وتقوي الضعيف ، وهذا الشي مو طبيعي ، يعني خلاف الطبيعة اللي جعلت بعض الناس أقوياء ، وجعلت البعض الآخر ضعفاء ..

 

ثانيا : الأخلاق ، فالتاريخ فيه نوعان من الأخلاق :

1-أخلاق نبيلة وسامية ، وهي اخلاق الشعوب القديمة وخاصة الرومان ، واللي چانت تعتبر الفضيلة هي الشجاعة والرجولة والجرأة ..

2-أخلاق وضيعة دنيئة ظهرت في الشرق ، واليهود هم اللي صنعوا هاي الاخلاق أيام ضعفهم ، وإعتبروا أن الفضيلة هي الإيثار والتواضع والعطف وغيرها ..

-وأي نوع من الأخلاق يفضله نيتشه ؟ 

-نيتشه يفضل الأخلاق الأولى على الثانية ، ويعتبر أن الشرف وثني روماني أرستقراطي ، ويعتبر الضمير والطيبة والعطف ، من آثار اليهودية والمسيحية والديمقراطية ..

-شنو دليله على هذا الكلام ، يعني شنو دليله على أن القوة هي الفضيلة ، والضعف والتسامح هو الشر والرذيلة ؟

-يگول : حب القوة والتملك ، أشياء غريزية عند الإنسان ، يعني كل إنسان بقرارة نفسه يريد -(ارادة القوة ) -أن يكون مسيطر على كل شي ؛ بس مرات ينافق الإنسان وي نفسه ويدعي أنه يبحث عن الحق والحقيقة فقط ، ويظهر للمقابل بمظهر الإنسان الحباب والطيب والمتواضع ، وهو بداخله يبحث عن السيطرة والمجد الشخصي ..

-شلون يعني ؟

-يعني مثلا ، تشوفلك واحد يحبله وحده ، فتشوفه يتودد لمحبوبته ، ويتقربلهه بالهدايا والمجاملات والكلام المعسول ، بحيث من تشوفه بهاي الحالة ، تحلف بالعباس ، إنو هذا المحب ماعنده كل دغش ، وكل اللي يهمه هو راحة وسعادة محبوبته فقط ؛ بس بالحقيقة هذا المحب هدفه من وره هاي الهدايا والمجاملات والكلام المعسول ، هو السيطرة على المحبوب ، والرغبة في تملكه مثلما يتملك أي سلعة رخيصة ..او غالية ..

-يعني نيتشه قصده ، إنو إرادة القوة ، وحب القوة ، وحب التملك ، هاي أشياء طبيعية غريزية عند الإنسان ، ولازم الإنسان يصير قوي وصادق وي نفسه ، ويظهرهن امام الناس ومايستحي منهن ، وعليه أن مايغلفهن بغلاف التقوى والحب والبحث عن الحقيقة ، يعني بعبارة صريحة يگول نيتشه للشخص اللي مسوي روحه متواضع وحباب ولطيف : خلي يولن أبو الشباب ، هاي مو طبيعتك وحقيقتك ، أنت طبيعتك وحقيقتك "ذيب امعط" بس لابس جلد حمل وديع ..

 

والحمد لله ..

 

الفيلسوف_نيتشه ( الحلقة الأولى )

 

باسم_الشبلاوي


اذا لم تظهر لك التعليقات فأعد تحميل الصفحة (F5)

مواضيع أخرى للناشر

(البحت)

يسولفون على وحده زعلت ويه رجلها ..راد منها الزلمة يمعودة اتعوذي الشيطان گول ما رضت تبقه ومن الصبح صرت اهديماتها
......المزيد

تجربة سجن ستانفورد

من أغرب التجارب في التاريخ في دراسة أثارت جدلا واسعا،
......المزيد

الوجود.. والماهية ؟؟!!

-كل شي بالدنيا إله جهتين : وجود وماهية ، مثلا السماء إلهه وجود وإلهه ماهية
......المزيد

العود.. الابدي عند نيتشة (الحلقة السادسة)

نيتشه عنده فكرة مهمة في فلسفته إسمها "العود الابدي" .. -شتگول هاي الفكرة ؟
......المزيد

نيتشة والسلطة (الحلقة الخامسة)

-يگول نيتشه : يجب أن يكون الحكم والسلطة بيد الطبقة الارستقراطية
......المزيد

مات الإله.. عند نيتشة (الحلقة الرابعة)

إنتقد نيتشه الدين بصورة عامة ، وإنتقد الدين المسيحي بصورة خاصة ..
......المزيد

نيتشة والمرأة (الحلقة الثالثة)

يگولون : نيتشه چان يكره النسوان كلش ، ويموت منهن ، إلى درجة إنو فد مرة گال عن النسوان :
......المزيد

السوبر مان او الإنسان الخارق عند نيتشة (الحلقة الثانية)

-يؤمن "نيتشه" بنظرية التطور مالت دارون ، ويؤمن أن الإنسان الحالي تطور من كائنات أدنى منه مرتبة ، وإنو التطور
......المزيد