-وشنو هذا السوبرمان ، سولفلي عنه شوية ، ممكن ؟

-السوبرمان : هو الإنسان اللي يبلغ مرحلة متطورة من الوجود ، بحيث يصير عنده مناعة ضد الأمور الإنسانية مثل : الشفقة والرحمة والعطف والمعاناة وإحتمال الضعفاء وغلبة قوة الروح على قوة الجسد والإيمان بالحياة بعد الموت وغيرها ، هاي الأمور كلها ، السوبرمان لايؤمن فيها ولايتبناها ..

-چا بيمن يؤمن السوبرمان ؟

-يؤمن السوبرمان بأنه هو اللي لازم يشرع القيم والأخلاق ، يعني هو اللي يحدد إنو هذا الشي خير وإنو هذا الشي شر ، بدون الإعتماد على الدين أو الفلسفات الأخلاقية في تكوين القيم والأخلاق ، فالسوبرمان يستخدم عقله فقط ، للوصول إلى القيم والأخلاق ، وماياخذ القيم والأخلاق جاهزة من المجتمع أو الدين ، وهذا الشي يخليه سعيد ومرتاح ومنطلق ..

-عود ليش السوبرمان ، مايؤمن بالروحانيات أو الحياة بعد الموت وغيرها من الأمور التي تعارف الناس على كونها ممدوحة ؟

- لأن السوبرمان مايؤمن بالأديان ، ولايؤمن بوجود الله ..

-زين ، شنو نظرة نيتشه للإنسان الحالي ؟

-نيتشه يعتبر الإنسان الحالي ، مجرد "دودة حقيرة" ، تثير الاشمئزاز ..

-شنو القيم اللي يؤمن بيهه هذا السوبرمان ؟

-القيم الوحيدة اللي يلتزم بيهه السوبرمان ، هي القيم اللي ترفع شأن الإنسان ، وتخليه قوي وشجاع وسعيد وصريح ويحب نفسه ويفضلهه ع الكل ..

-شلون يعني ؟

-أكو بعض الفلاسفة يگولون : إذا أردت أن تتخلص من آلامك ومعاناتك ، فلازم تأيس من الحياة وتغرگ بحزنك ؛ حتى بعدين تگدر تستسلم بصورة تامة للرب ، ويكون عندك إيمان مطلق بيه ..

-ونيتشه شنو رأيه بهذا الكلام ؟

-نيتشه يگول : عوفك من هاي الكلاوات اللي ماتوكل خبز ، لازم تترك هاي الأمور اللي تجعل منك إنسان ضعيف وخنيث ، ولازم تعتمد على نفسك فقط ، حتى تكون انسان قوي وسعيد ، يعني تكون "سوبرمان" ..

-حلو ، زين هذا السوبرمان ، راح يجي عن طريق التطور الطبيعي ، لو راح يجي عن طريق التطور الصناعي ؟ يعني بعبارة أخرى : نترك الامر للطبيعة وهي اللي تتولى تطوير الإنسان الحالي الى سوبرمان ؟ لو لازم إحنه نتدخل صناعيا بتكوين السوبرمان ؟

-يگول نيتشه : صحيح أكو تطور بالطبيعة ، ممكن من خلاله يتطور الإنسان الحالي الى سوبرمان ؛ بس لازم مانعتمد ع الطبيعة ؛ لأن الطبيعة شغلتهه بطية وتطول ، لازم إحنه نطور الإنسان الحالي ونخليه سوبرمان ، بطرق صناعية نسويهه بأيدينا وتحت إشرافنا ؛ حتى نضمن إيجاد هذا المخلوق اللي إسمه "السوبرمان" بأسرع وقت ..

-وشنو هاي الطريقة الصناعية اللي من خلالهه نگدر نصنع السوبرمان ؟

-يگول نيتشه : الطريقة هي ان نزوج الرجال الأقوياء والأصحاء والاذكياء ، بنسوان قويات وصاحيات وذكيات ؛ حتى نضمن إنو فروخهم وجهالهم راح يطلعون مثلهم ، أقوياء وصاحين واذكياء ، وذوله الفروخ نسويلهم مدارس خاصة ، نعلمهم بيهه القوة والقسوة والعنف والجرأة والشجاعة ، وهذا الجيل راح يطلع جيل مقدام وسبع ومايوگف بوجهه شي ، ومايعترف لا بخير ولا بشر ، لأنو الخير فقط هو اللي يخلينه نحس بقوتنه ، والشر فقط هو اللي يخلينه نحس بضعفنه ..

والحمد لله ..

الفيلسوف_نيتشه ( الحلقة الثانية )

باسم_الشبلاوي