--ليش ؟

-لأن الدين -من وجهة نظر نيتشه- يحول الناس إلى أشخاص ضعفاء وخانعين ، ويهتمون بالعالم الآخر أكثر من حياتهم الحالية ، فيتنازلون عن أحلامهم وطموحاتهم ورغباتهم الطبيعية بحجة إنو همه راح يحققوهه بالعالم الآخر ..

-وشبيه هذا الكلام ، يعني شنو الإشكال في إنو الإنسان يتنازل عن بعض رغباته بالدنيا ، علمود يحصل أشياء أحسن بالاخرة ؟

-المشكلة إنو نيتشه رجال ملحد ، مايعترف بالآخرة والجنة والنار وغيرها من الأمور الغيبية ، يعترف فقط بهاي الحياة ، يگول : عيشوا حياتكم لحظة بلحظة ؛ عيشوهه بحلاوتهه وبمرارتهه ، لأنو ماعدكم غير هاي الحياة ، فإستغلوهه أتم إستغلال ، وصيروا حبابين ولاتدورون غيبيات ..

-جيد ، نيتشه عنده عبارة يگول بيهه : ( مات الإله ) ، شنو قصده من هاي العبارة ؟

-إختلف الباحثون في تفسير هاي العبارة (مات الله ) إلى تفسيرين :

الاول : إن الله غير موجود من الأساس ؛ يعني ماكو شي إسمه الله ، فكرة الخالق والإله والرب ، ما إلهه اي صحة في الواقع ، فنيتشه چان قصده من عبارة (مات الله ) : إن الله غير موجود ، نقطة راس سطر ..

الثاني : إن الله موجود في الواقع ؛ ولكن مو هوه نفسيته الإله اللي تؤمن بيه المسيحية او غيرها من الأديان ؛ يعني إحنه عدنه إلهين : إله حقيقي وواقعي ، وإله مزيف مو حقيقي ، وهو اللي تؤمن بيه الأديان ، فنيتشه چان يقصد بموت الاله ، موت هاي المفاهيم والتصورات الخاطئة عن الله في الاديان ، فهوه ماينكر وجود الله ، وإنما ينكر الاله اللي تؤمن بيه الأديان ..

-زين ، شنو چان موقف نيتشه عندما أطلق هاي العبارة (مات الله ) ، يعني هل كان فرحانا لأنو بعد ماكو إله ، لو چان ضايج وحزين بسبب هاي الفكرة ؟

-يگولون : چان يضوج بعض الأحيان بسبب هاي الفكرة ؛ لأنو كان يعتقد أن الإيمان بالله ، يساعد الناس على تحمل صعوبات الحياة وآلامها ومعاناتها ، والناس راح تتبهذل إذا عرفت إنو ماكو إله ، فالإيمان حتى لو كان غير واقعي ، إلا أنه مفيد من الناحية النفسية للناس ..

- اها ، زين ، شنو موقفه من الإسلام ؟

-يگولون : نيتشه چان موقفه زين من الإسلام ؛ لأنو الإسلام دين قوي ويحب الحياة وينطيهه أهمية كبيرة وهو مايوافق فلسفة نيتشه ، بعكس المسيحية اللي تغلب عليها الروحانيات والرهبنة وترك الملذات الدنيوية ..

والحمد لله ..

الفيلسوف_نيتشه ( الحلقة الرابعة )

باسم_الشبلاوي