-يقصد ديكارت بالإمتداد الجسم أو المادة ، ويقصد بالفكر الروح أو العقل ، مو صحيح ؟

-نعم صحيح ، والروح عند ديكارت تختلف تماما عن الجسم ؛ يعني الروح من عالم والجسم من عالم آخر تماما ، الروح جوهر مستقل بنفسه والجسم جوهر آخر مستقل بنفسه ؛ يعني بالعربي ماكو وجه شبه بين الإثنين ابدا..

-زين ، إذا الروح من عالم والجسم من عالم آخر ، وماكو أي شبه بين الروح والجسم ، چاشلون جاي نلاحظ أكو تفاعل بين الروح والجسم أو بين العقل والجسم ؛ يعني مثلا اذا تعور الجسم راح تتألم الروح ، وإذا خافت الروح مثلا فراح يصفر الجسم ، فشنو سبب هذا التفاعل الواضح إذا ماچان أكو أي وجه شبه بين الروح والجسم مثلما يگول حجي "ديكارت" ؟

-خوش سؤال ، "ديكارت"يگول : أكو شي بداخل دماغ الإنسان هو اللي يربط بين الروح والجسم وبالتالي يؤدي إلى هذا التفاعل اللي جاي نشوفه ، وهذا الشي هو "الغدة الصنوبرية" ، سامع بيهه ؟

-إي إي أعرفهه كمل ..

-خوش ، هاي الغدة تاخذ أوامرهه من الروح وتنطيهه للأعصاب والعضلات ، يعني الغدة تگول للأعصاب والعضلات : الروح تريد منكم ان تتحركون مثلا ، هنا الأعصاب والعضلات يگولون : سمعا وطاعة ويبدؤون بالتحرك ، بالك يمي ؟

-إي نعم بالي يمك ..

-وكذلك هاي الغدة تستقبل الآثار الجاية من الحواس الخمسة وتوصلهه للروح وبالتالي تبدأ الروح بالتفاعل مع هاي الآثار ؛ يعني مثلا ، العين تشوف منظر مؤلم وحزين ، تقوم الغدة بإيصال هذا الشي إلى الروح ، فتبدأ الروح بالشعور بالحزن وهكذا ، إذن ديكارت يفسر سبب التفاعل بين الروح والجسم بوجود هاي الغدة اللي تعتبر حلقة وصل بين الروح والجسم ..

#والحمد لله ..

#الفيلسوف_ديكارت ( الحلقة الرابعة )

#باسم_الشبلاوي